சங்கத்தில் பாடாத கவிதை

உயிரோசை'யில் வெளியான கவிதை

எழுதிக்கொண்டிருந்த
கவிதையை
தென்றல் அடித்து
கலைத்துக்கொண்டிருந்தது

எழுதி முடித்த சொற்களின்
மேல் பல இடங்களில்
அது தன் புள்ளிகளை
கோலங்களை இட்டுச்சென்றது

சில வரிகளில்
சந்திகளில் ஒற்று
மிகுந்து அவற்றை
வலுவாக்கியது

சில வரிகளில்
ஒற்றுகளை சேதப்படுத்தி
சொற்களைத் தனிமையில்
நிற்கச்செய்தது.

இப்படி எல்லாம் செய்த
தென்றல் பாதியிலேயே
விட்டுச்சென்றுவிட்டது

கவிதையை முடித்து வைக்க
இன்னொரு தென்றலை
எதிர்பார்த்துக் காத்திருக்கிறேன்
யாரேனும் அதைக்கண்டால்
கொஞ்சம் என்னிடம்
அனுப்பி வையுங்கள்.

.