ஆப்ரா இசைக்கச்சேரி. சென்னையில் ரஹ்மானின் இசைப்பள்ளியில் ஆப்ரா இசையைப் பயிற்றுவிப்பவர் Nina Kanter மற்றும் அவரது மாணாக்கர், Himanshu Barot பின்னர் ஒரு பியானிஸ்ட் Karl Lutchmayer என ஒரு குழு இன்று கச்சேரி நடத்தியது. முழுக்க முழுக்க ஆப்ரா (Opera) நமக்குப் பழக்கமில்லாத முட்ட முழுக்க அன்னிய இசை. சிம்பிளாக சொன்னால் ஓலமிட்டுக்கொண்டே பாடுவது . ஆனால் இதுதான் மேற்கத்திய வாய்ப்பாட்டு (குரலெழுப்பி பாடுவது). நிறைய பாடினர். ஷூபர்ட்’டின் இசைக்கோவை, பின்னர் நிறைய ஜெர்மன் இசை (அப்படித்தான் நினைக்கிறேன் ஒண்ணும் புரியலை) , இருப்பினும் பின்னில் திரையில் அப்பாடலின் ஆங்கில வரிகள் அவ்வப்போது திரையிடப்பட்டன. வாசித்துக் கொள்ளலாம். எனினும் ஒன்ற முடியவில்லை.
பழக்கமில்லாத இசை.எனக்கென்னவோ மெளலின் ரூஜ் (Moulin Rouge) படத்தைப்பார்ப்பது போலவே இருந்தது நிகழ்ச்சி முழுதும்.
பாடலிலேயே முழுக்கதையும் சொல்கிறார், இடையில் கைதட்டல் ஏதும் வேண்டாம் எனப்பணித்துவிட்டு, பின்னில் திரையில் தோன்றும் டெக்ஸ்ட்டை வாசித்து கதையை புரிந்துகொள்ளலாம். ஒரு வித நாடகீயமான, பாடிப்புரியவைக்க முயலும் கதைகள் (அப்பா..ஒரு வழியா சொல்ல முடிந்தது இப்படி)
இந்த ஐரோப்பிய பெண்மணியிடம்(Nina Kanter) ரஹ்மானின் பள்ளியில் பயின்ற ஒரு மாணவரும் பாடினார். நிறைய பரிசுகள் வாங்கியிருக்கிறாராராம். ஆசிரியரும் புகழ்ந்து தள்ளினர். அவர் ஒரு மெக்ஸிகன் தாலாட்டு பின்னர் வழக்கம் போம ’அவே மரியா’ (Ave Maria – Hail Mary)வைப்பாடினார். இந்தப்பாடல் மட்டுமே எனக்கு பரிச்சயம், (எனது கிட்டார் நோட்ஸில் இது உள்ளது) இசைக்கும் போது கேட்டுச்செல்வது என்பது எளிது. அதையே வாய்ப்பாட்டெனில் குளிரில் நடுங்கி குரலெழுப்பவியலாதவர் போல பாடுவர். அவ்வளவும் ரசிக்க இயலாது போகும்.
ஐ படத்தில் ‘ஐலா ஐலா’பாடல் இந்த ஆப்ரா பாணியில் அமைந்த முதல் தமிழ்ப்பாடல். எத்தன பேர் கேட்டீங்க?...அதான்...நமக்கு ஒருநாளும் ஒத்தே வராத இசை. நடாலி டி லூச்சியோ’ அப்ப்டீன்னு ஒரு வெளிநாட்டு பொம்மனாட்டி, வெளிநாட்டு பாட்டு செட்டக்கொண்டாந்து எறக்கி பாடவெச்சார் நம்ம ரஹ்மான். ஏன்னா இங்குள்ள வேறு யாராலும் பாட இயலாத இசைக்குறிப்புகள் அத்தனையும் ஆப்ரா. ஓரளவு நம்ம ஆண்ட்ரியா (ஆஹா.. வந்துட்டாங்கோ.. ஹிஹி) இந்த இசையைப் பாடுவார். ’ஹூஸ் த ஹீரோ ஹூஸ் த ஹீரோ’ன்னு அது கூட ஒரு துணுக்கு தான். நிறைய எதிர்பார்க்க முடியாது.
கடைசியாக ஒரு தமிழ்ப்பாடல் (ஆமாங்க ஆமா) , பாரதியாரின் ‘சின்னஞ்சிறு கிளியே கண்ணம்மா’வை ஆப்ரா ஸ்டைலில் பாடினார் Sandeep Gurrapadi என்ற இன்னொரு ஆப்ரா பாடகர். (அதான சென்னைல படிச்சுட்டு தமிழ்ல பாடலன்னா எப்டி?) உச்சரிப்புகளை மன்னிக்கலாம். உண்மையில் அது ஒரு ட்ரூ ஆப்ரா வெர்ஷன். ஷ்ருதிஹாசனை போட்டுக்கலாய்த்து தள்ளியது ஞாபகமிருக்கலாம் எல்லோருக்கும் ‘தென்பாண்டி சீமையிலே’வை அவரது வெஸ்ட்டர்ன் பாணியில் பாடிவைத்து பாட்டு வாங்கிக்கொண்டார். இங்கு இந்த சின்னஞ்சிறுகிளி ஆப்ராவை கேட்டால் எல்லோரும் அதையே சொல்வர்.
ஆர்ட் ம்யூசிக் ஃபெஸ்டிவல் சென்னையில் அடுத்த வாரம் நடக்க இருப்பதாகவும், (எதோ இடம் சொன்னார் மறந்துவிட்டது) அங்கு பாட நினைத்த சில பாடல்களை முதன் முதலாக இந்த பெங்களூர் மேடையில் பாடியிருக்கிறோம் என்று (ஆஹா.. அப்ப நாந்தான் முதலில் கேட்டது) பெருமிதமாக அந்தப்பெண்மணி கூறினார். அரங்கிற்குள் செல்ல எத்தனிக்கையில் RSVPஇல் பெயர் உள்ளவர்கட்கு மட்டுமே அனுமதி என்று குண்டைத்தூக்கி போட்டனர் வாயிலில். சிறிது நேரங்கழித்து அவர்களை முன்னர் செல்லவிட்டு பின்னர் பதிவு செய்யாத என்னைப்போன்ற பாவாத்மாக்களை உள்ளே விட்டனர். ஆப்ரா வாழ்க.
