புதிய கடவுள்

உயிரோசை'யில் வெளியான கவிதை

விலங்குகள்,பறவைகள் அனைத்தும்
வாகனமாகிப்போனது என் பழைய கடவுள்களுக்கு

மரங்கள், குத்துச்செடிகள் அனைத்தும்
தல விருட்சமாகிப்போனது என் பழைய கடவுள்களுக்கு

மலைகள்,கடற்கரைகள் அனைத்தும்
கோவில்களாகிப்போனது என் பழைய கடவுள்களுக்கு

குகைகள், முட்டுச்சந்துகள் அனைத்தும்
இருப்பிடமாகிப்போனது என் பழைய கடவுள்களுக்கு

இலக்கியங்கள், புராணங்கள் அனைத்தும்
புனித நூல்களாகிப்போனது என் பழைய கடவுள்களுக்கு

கனிகள்,காய்கள் அனைத்தும்
படையல்களாகிப்போனது என் பழைய கடவுள்களுக்கு

அழகிய கன்னிகள், வேட்டுவப்பெண்டிர் அனைவரும்
காதலியர் மற்றும் மனைவியராகிப்போயினர் என் பழைய கடவுள்களுக்கு

ஒரு கடவுள் விலங்கை வாகனமாகக்கொண்டான்
ஒரு கடவுள் அதே விலங்கைப் படையலாகக்கேட்டான்
ஒரு கடவுள் பறவையைத் தோழனாகக்கொண்டான்
ஒரு கடவுள் அதே பறவையைப் படைக்கச்சொன்னான்
ஒரு கடவுள் ஒரே மனைவியோடு இரு என்றான்
ஒரு கடவுள் கூட்டுக்கலவியும் சரி என்றான்.ஒரு கடவுள் என்னை ஐந்துமுறை தொழு என்றான்
ஒரு கடவுள் என்னை எப்போதும் நினை என்றான்.

இதுகாறும் கண்டுபிடிக்கப்பட்டு
நம்மோடு கூடவே இருந்துகொண்டிருக்கும்
இந்தப்பழைய கடவுள்களோடு
தினந்தோறும் மல்லுக்கட்டி
எனக்குச்சலித்துத்தான் போனது 

உங்களில் ஒத்த கருத்துடைய
யாரேனும் புதிதாக
ஒரு கடவுளைக்கண்டுபிடித்தால்
எனக்குச்சொல்லியனுப்புங்கள்

.