மழையும் தேநீரும்

உயிரோசை'யில் வெளியான இன்னுமொரு மழைக்கவிதை

தலை நிமிர்த்திக்கொண்டு
பார்த்துக்கொண்டே
நடந்துகொண்டிருந்த எனக்கு
இருட்டிக்கொண்டு வந்த வானம்
பொழியக்காத்திருந்தது

இன்னும் கொஞ்சம் தான் தூரம்
எட்டி நடந்தால் சென்றடைந்து விடலாம்
அருகிலுள்ள தேநீர்க்கடையை

ஏற்கனவே கடைக்கு முன் சிலர் நின்றிருந்து
வழியை அடைத்துக்கொண்டிருந்தனர்
நாயரின் குரல் மட்டும் உள்ளிருந்து கேட்டது

ஆணை கொடுத்து காத்திருந்தபோது
முதலில் விழுந்த துளி
அருகில் புகைத்துக்கொண்டிருப்பவனின்
பீடி நுனியை நனைத்தது.
சட்டென உதறியவனின் கங்கு
என் கையின் பின்புறத்தில் விழுந்து
சிறு சூட்டை உணரச்செய்தது

தொடர்ந்தும் பெய்த மழை
மேற்கூரைத் தகரங்களில் ஒலியெழுப்பிக்கொண்டு
தாரை தாரையாக விழுந்து கொண்டிருந்தது

தெறித்த மழைநீருடன் கரையை ஒட்டியிருந்த
சேறும் சகதியும் வேட்டியைத் தூக்கிப்பிடித்த
என் கால்களில் அப்பிக்கொண்டது

நனைந்து கொண்டிருந்த குருவிகள்
தம் அலகால் தெப்பலாக நனைந்த
இறகுகளைக் கோதி விட்டுக்கொண்டிருந்தன

பொழிந்து முடித்த வானம்
வெளிர் நீலமாக சுத்தமாகக்கிடந்தது.
ஆங்காங்கே சிறு குட்டைகளில்
தேங்கிக்கிடந்த மழை நீரில்
தலை கவிழ்த்து
என் முகம் பார்த்துச்சென்று
கொண்டிருக்கிறேன்.

இன்னொரு மழைக்கும்
இன்னொரு தேநீருக்கும்
எத்தனை காலம் காத்திருக்கவேண்டிவரும்
என மனதிற்குள் எண்ணியபடி.

குறை ஒன்றும் இல்லை  

தேநீரில்
சர்க்கரை அளவு குறைவு
போலத்தென்பட்டது.
சற்று ஜன்னலின் வெளியே
கோப்பையை நீட்டினேன்
விழுந்தன சில துளிகள்
குறை ஒன்றும் இல்லை
இப்போது ..


.