துளிப்பாக்கள்

மலைகள் இதழில் வெளியானவை

யாரும் இறங்கவும்

ஏறவும் வேண்டியதில்லை

பரிசலும் ஆறும்

இடைவிடாது

ஆடிக்கொண்டுதானிருக்கிறது

**

என்னுடன் பயணிக்கும்

யாருக்கும் என்னுடன் பேச

ஏதோ ஒன்று இருக்கிறது

**

என் மதத்தில்
தண்டிக்கவியலாத கடவுளை
அடுத்த மதத்தில்
தண்டிக்கலாமென்றிருக்கிறேன்

**

உன்னைக்கண்டால்

கடவுள்களுக்கும்

சொப்னஸ்கலிதம் நேரும்

**

கூட்டுப்புழுக்காலத்தில்

அனுப்பிய செய்தி

வண்ணத்துப்பூச்சியின்

காலம் வரை வந்து சேரவில்லை

**

மூங்கில் துளைகளைப்புணரும் காற்று

இசைக்குழந்தையை

உடனே பெற்றெடுக்கிறது

**

பென்சில் சீவும்போது

கிளம்பிய வாசம்

மரம் கடைசியாகத்

தக்கவைத்துக்கொண்டது

**

ஏணியிலும்

முதற்படிக்கே

துயரம் அதிகம்.

***

  .