துளிப்பாக்கள்

 மலைகள் இதழில் வெளியானவை

இலையுதிர்காலம்

புலம் பெயர

நினைக்கும் மரங்கள்

-

எல்லாபேய்களும்

என்னைச்சந்திக்க வருமுன்

லாண்ட்ரிக்குச்சென்றுவிட்டே

வருகின்றன

-

என் வலைப்பூவிற்கும்

அவ்வப்போது தேவைப்படுகிறது

கொஞ்சம் வெய்யில்

-

காற்றை வரைய

முற்பட்டேன்

கலைந்த கிளைகளோடே

நிறுத்திவிட்டேன்

-

தற்கொலை செய்துகொள்ள

மலையுச்சியில் நின்றுகொண்டிருக்கிறேன்

எனக்கு முன்னாலேயே

நிழல் கீழே விழுந்துவிட்டது.

-

எனக்காக பூமி

தன்னைச்சாய்த்துக்கொண்டு

இந்த வெய்யிலை என்

முற்றத்தில் கொணர்ந்திருக்கிறது

-

விழ எத்தனித்த ஒரு துளி

மழைநீரை

அந்தக்காம்பு ஏனோ பிடித்து

வைத்துக்கொண்டிருக்கிறது

ஒரு கணம் தட்டிவிட்டுவிடலாமா

என எண்ணிய எனக்குள்

ஒரு மிடறு

உள்ளிறங்கிக்கொண்டிருக்கிறது

-

எத்தனை காடுமலைகள்

கடந்து வந்திருக்கும்

இந்தக்கைப்பிடி நீர் ?

என் கைகளையும்

ஒரு தரவாக்கிக்கொள்ளும் அது.

-

ஒரு மரத்தைக்கொல்வதும்

ஒரு கவிஞனைக்கொல்வதும் சுலபம்

இரண்டிலிருந்தும்

பறவைகளை நீக்கிவிட்டால்

போதும்

-

நினைத்தவுடன் பறந்துபோய்

மலர்களுக்கிடையே

அமர்ந்துகொள்ளும் பறவை நான்

-

உலகத்தில் இரண்டே பேர்

காதலிக்க நினைப்பவர்களும்

காதலிப்பவர்களும்

-

கனவுக்குள்

உறங்கினால்

வருவது

நனவாகத்தானிருக்கும்

-

மாற்றம் என்ற ஒன்று

எப்போதும் வருவதேயில்லை

அதனாலேயே அது

மாறாதிருக்கிறது.

-

உருளும் கூழாங்கல் நதியை

அதன்போக்கில் அனுபவிக்கிறது.

-

 

 .