என் ஆசிரியனைக்கொல்ல

உயிரோசை'யில் வெளியான கவிதை

எனக்கும் ஆசைதான்
என் ஆசிரியனைக்
கொல்லவேணுமென்று

என்ன செய்தாலும்
தவறு கண்டுபிடிப்பார்
எவ்வளவு சரியாக எழுதினாலும்
பிழை கண்டு சொல்வார்

நேரத்தாமதங்களை அவர்
ஒருபோதும் அனுமதித்ததேயில்லை
வீட்டுப்பாடங்களை முடிக்காமல்
வந்தால் முட்டி நிச்சயம் அடுத்தநாள்

ஒப்பிட்டு பேசியே
நாள் முழுதும் ஓட்டிடுவார்,
எரிச்சல் கிளம்பினும்
வாய் திறந்து
ஏதும் சொல்ல இயலாது

அரை மதிப்பெண்ணில்
தவறவிட்ட முதலிடத்தை
எப்போதும் சுட்டிக்காட்டுவார்

காற்றிறக்கிய மிதிவண்டியை
உருட்டிச்செல்லுமவரை
குறுகுறுப்புடன் பார்த்து மகிழ்வேன்
இருக்கையில் வேம்பின்
பிசினை ஒட்டி வைத்து
அவரின் கிழிந்த வேட்டியை
கண்டு மகிழ்வேன்

பிற நண்பர்களுடன் கூடி
கொஞ்சம் அசட்டுத்தைரியத்தில்
அவர் பெயரை கல்லறையில்
எழுதிவைத்தும் இருக்கிறேன்.

வாங்கிச்சரிபார்த்து
மதிப்பெண் இட எத்தனித்த
அவனின் நோட்டுப்புத்தகத்தில்
என் கவிதை
எங்கனம் வந்தது ?

 

.