சாதகப்பறவை

                                             எனது முன்னூறாவது பதிவு

எப்பக்கம் முன்னேறிச்செல்கிறது

என அறியாத மண்புழு போல

பின்னிக்கிடந்தனர்.

ஆளரவம் கேட்டதும்

வெட்டுண்ட மண்புழு போல்

ஆளுக்கொரு திசையாக

பிரிந்துசென்றனர்.

அதே உயிர்ப்போடு.

****

மைக்கூட்டில் செருகி வைத்த

பறவையின் இறகு

அவன் வரும் வரை காத்திருந்து

தன் கதையை எழுதிப்பார்க்கிறது

 

****

காலணியின் குதிகால்

டக் டக்கென ஒலியெழுப்பும்படி

நடந்துவந்துகொண்டிருந்தாள்

என் கூடவே சாலையில்

திரும்பிப்பார்க்காது வந்துகொண்டிருந்த

நான் குதிரையோ என எண்ணிக்கொண்டு

வழி விட்டேன்

பிறகும் என்னோடேயே

நடப்போர் கடக்கும் இடத்தை

பட்டைக்கோடுகளினூடே கடந்தாள்

ஆஹா வரிக்குதிரை

என எண்ணிக்கொண்டேன்

****

ட’ போன்ற வளைவு

என யாரும் சொல்வதில்லை

எல் போன்ற வளைவுதானே

என நீங்களும் இப்போது

கேட்டீர்கள்.

செருப்பு போடாத கொக்குகள்

ஊருணிச்சேற்றுக்குள்

கால்களை விட்டுக்கொண்டிருக்கின்றன

எனக்குத்தான் என்னவோ

போலிருக்கிறது

 

****

உடைந்து அழுகிறேன்

நீர் கசிகிறது

****

அழகற்ற

உடலைப்பற்றிய கவலை

முதலைகள்

கண்ணீர் வடிக்கின்றன

 

****

லகோஸ்ட் ட்டீ ஷர்ட்டின் முதலை

எப்போதும் என் நெஞ்சைக்குறி வைக்கிறது

காலணியிலிருக்கும் பூமா பாய்ந்து

என் விரல்களைப்பற்றித்திங்க

நினைக்கிறது.

எல்லாம் சரிதான் என

எதிரே நடந்துவந்தவனின்

காலணியில்

‘ஜஸ்ட் டூ இட்’ என

டிக் மார்க் காண்பிக்கிறது

*****

மழையைப்பற்றி எழுத நினைத்தாலும்

நனையாமல் எழுதினால் தான்

தங்குகிறது

****

அடித்த ஒரு மணியிலேயே

அழைப்பை ஏற்றுப்பேச எத்தனித்த

எதிர் முனையாளன் போல்

இப்போது விக்கித்து நிற்கிறேன்

****

ஃப்ரிட்ஜில் வைத்த

நேற்றைய பால் பாத்திரத்தை

எடுத்து வெளியே வைத்தேன்

குடிக்க வந்த

என் அன்னத்திற்கு

ஐஸ் கட்டியைப்பிரித்தெடுக்க

தெரியவில்லை

****

எப்போதும் மழை நீரை மட்டுமே

அருந்தும் சாதகப்பறவை ஒன்றை

வளர்த்துவருகிறேன்

பெங்களூரிலும் இப்போதெல்லாம்

மழை குறைந்துவிட்டது

வெய்யிற்காலங்களில்

அதற்குத்தெரியாமல்

என் யூபிஎஸ் பேட்டரிக்கென

வாங்கி வைத்திருந்த டிஸ்ட்டில்டு வாட்டரை

பருகக்கொடுத்துவிடுவேன்.

குவளையினின்றும் தெறித்துவிழுந்த நீரைக்கூட

முழுதும் உறிஞ்சிக்குடித்துவிடுகிறது

*****

 

மலைகள் இதழில் வெளியானவை

.