ரெயின்போ லேண்ட்

’கதா சங்கமா’ன்னு ஒரு குறும்படத்துண்டுகளாலான ஒரு கன்னடத் தொகுப்புப்படம் பார்த்தேன். புட்டண்ணா கனகல் என்ற பழம்பெரும் கன்னட இயக்குநரின் உத்தியில் ஏழு படங்கள், ஏழு இயக்குநர்கள்,ஏழு ஒளிப்பதிவாளர்கள் என ஏழு சிறு குறும்படங்களின் தொகுப்பு. நம்ம பாலச்சந்தர் கூட இது போல ‘ஒரு வீடு இரு வாசல்’ன்னு இரண்டு படங்களை ஒரு படத்தில் காட்டினார்.

புட்டண்ணா கனகல் இதே ’கதா சங்கமா’ங்கற பெயரில் மூன்று குறும்படங்களை இயக்கி இருக்கிறார். அவரின் பின்னணியில் அவருக்கு புகழ் சேர்க்கும் வகையில் இப்போது இந்த சங்கமா எடுக்கப் பட்டிருக்கிறது.  புட்டண்ணா எடுத்த அந்த மூன்று கதைகளில் (முனித்தாயி) ஒன்றுதான் ‘கை கொடுக்கும் கை’ என்ற பெயரில் தமிழிலும் வெளிவந்தது. ஒரிஜினல் முனித்தாயி’யில் அந்த கண்ணிழந்த பெண்ணை வன்கலவி செய்த கதா பாத்திரத்தில் ரஜினிகாந்த் நடித்திருந்தார்( அப்போல்லாம் அவர் வில்லன்ங்ணா :) ) ஆனால் தமிழின் கை கொடுக்கும் கையில் அவர் தான் ஹீரோ.

சரி இப்ப 2019ல் வெளிவந்த கதா சங்கமா’வைப்பற்றி பேசலாம். ஒன்றுக்கொன்று தொடர்பே இல்லை. அத்தனை படங்களும் அதனதன் ஜானர்களில் அமைந்திருக்கின்றன. ஏழில் மிகப்பிடித்தவை என்று கூறினால் ’ரெயின்போலேண்ட்’, ’பதுவரஹள்ளி’,’வென் மேஜிக் கெட்ஸ் ரியல்’,  லச்சாவா’ என்ற குறும்படங்கள். மட்டுமே. மற்ற மூன்று படங்களான “கிர்கிட்டில், உத்தரா, கன்ஃப்ளூயன்ஸ் வித் ஓஷன்,” பத்தோடு ஒன்றாக அமைந்திருக்கின்றன. ஒவ்வொரு படமும் அரை மணிக்கூறு மட்டுமே. இருப்பினும் எடுத்துக்கொண்ட அரை மணிக்கூறில் எல்லாவற்றையும் விவரிக்க வேணுமே என்ற அவசரம் எதிலும் இல்லை. அதனதற்கான கால நேரத்தில் எடுக்கப் பட்டிருக்கிறது.

’ரெயின்போ லேன்ட்’குறும்படத்தில் கிஷோர்(’ஆடுகளம்’ வில்லன்) தனது மகளுக்கென ஒரு ரெயின்போ லேண்டை உருவாக்க நினைக்கிறார். மகள் நேற்றைய இரவில் கேட்டுக்கொண்டிருந்த கதையில் வரும் ரெயின்போ லேண்டுக்கு கூட்டிட்டுப்போ என்ற அடம் பிடிப்பதைக்கண்டு ,அடுத்த நாள் காலையில் அலுவலகம் செல்லும் வழியில் , மேம்பாலங்களுக்கு கீழுள்ள சுவர்களில் ஆர்வலர்கள் வண்ணம் தீட்டிக்கொண்டிருப்பதை பார்த்துவிட்டு தாமும் அது போலவே செய்யலாம் என்றெண்ணி கலர் காகிதங்கள், ஜிகினாக்கள், அட்டைப் பெட்டிகள் வண்ண பலூன்கள் எல்லாம் வாங்கிக்கொண்டு வீடு திரும்புகிறார் அலுவலகத்துக்கு மட்டம் போட்டு விட்டு. மீதமுள்ள நாள் முழுதும் ரெயின்போ லேண்டை உருவாக்கி விடுகிறார். மகள் பள்ளி முடிந்து வீடு திரும்பும் வேளை வந்து விடுகிறது. ஆர்வத்துடன் காத்திருப்பவருக்கு இடியாய் அதனுடன் கூடிய மழை பெய்து அத்தனை ரெயின்போ லேண்டையும் கலைத்து வண்ணங்களை நீராய் ஓட்டிக் கொண்டு போய் விடுகிறது. அத்தனையும் வீணாகிவிட்டதே என்று சோர்ந்து போய்க் கிடப்பவருக்கு மகள் வெளியிலிருந்து அழைப்பது கேட்கிறது.

அப்பா ரெயின்போ லேண்ட் ரெயின்போ லேண்ட் எனக்கூவுகிறாள் மகிழ்ச்சியில். இல்லையே எல்லாம் கலைந்து போய்விட்டதே எனக் கலக்கத்துடன் வெளியில் சென்று பார்ப்பவருக்கு மழை விட்டும் தூறல் நிற்காத இயற்கைத் தூவானம் அழகிய வானவில்லை மகளுக்கு காட்டிக் கொண்டிருக்கிறது. ஆஹா. என்ன அருமையான படமடா... :) கவிதை போல உள்ளக்கிளர்ச்சியைத் தரும் படம்.!

அடுத்த இரண்டு படங்கள் பற்றி பிறகு.

ஓசூர்ஆட்டோ

ஓலா ஊபர் வந்துருச்சு, அதோட பத்தாயிரம் குடுத்தா பைக் லோன் குடுக்குறான் அதான் சவாரியெல்லாம் கம்மியாருச்சு. இதே ஓசூர்ல நாலு வர்சம் முன்னாடி ஒரு நாளைக்கி ரெண்டாயிரம் மூவாயிரம் வரைக்கும் சம்பாதிச்சிக்கிட்டு இருந்தேன் . இப்ப ஐநூறு ரூவாய்க்கே நாக்கு தள்ளுது. இந்த ஆட்டோவே கடன்லதான் ஓட்றேன். ஸ்ரீராம் சிட்ல கடன் கேக்கப் போனேன் மாசம் ட்யூ ஒழுங்கா கட்டாம விட்டா, அஞ்சு நாளைக்கி ,பத்து நாளக்கி, பதினெஞ்சு நாளெக்கின்னு டிஸைன் டிஸைனா வட்டி கட்டச் சொல்றான். அதான் வீட்ல இருந்தவங்ககிட்ட பணத்த கிணத்த பொரட்டி ஓட்டிக்கிட்டு இருக்கேன். ஓலாவில சேத்துவிட்ட ஆட்டோக்காரனும் என்ன கடன்ல தான் ஓட்றான். மாசம் ஒண்ணாந்தீ ஆனா பத்தாயிரம் ஓலாக்காரனுக்கு கட்டியே ஆகணூம், இல்லன்னா வண்டிய சீஸ் பண்ணீட்டு போய்ருவான். அதுக்குப் பயந்து எதோ அஞ்சு பத்து கெடச்சாலும் சரீன்னு நட்டத்துல தான் ஓட்டிக்கிட்டு கிடக்குறாங்ய. 

ஆட்டோ ஒரு உருளைக்கிழங்கு சீவல் கடையைக் கடந்து சென்றது. எனக்குத்தெரிஞ்சு இந்தக் கடைக்காரர் நாலு கடை வெச்சிருந்தார். எல்லாம் சிப்ஸ் கடைதான். அமோகமா ஓடிக்கிட்டு இருந்துச்சு. வரிக்கட்ட முடியாம நொடிச்சுப்போய் இப்ப ஒத்தக்கடை மட்டும் தான் மிஞ்சிக்கிடக்கு. ஆளெல்லாம் வெச்சு வேல வாங்கிக்கிட்டு இருந்தாரு. இப்பப்பாத்தா அவரே எண்ணெச்சட்டி முன்னாடி நிக்கிறாரு.

ஆட்டோவின் சீட் பின்னில் இரண்டு இலைக்கட்டுகள் கிடந்தன. அதா அது ஒரு எழவு வீட்டுக்கு சாப்பாடு எடுத்துட்டுப் போனாங்ய.. செமத்தண்ணீ ரெண்டு பேரும். வீட்ல கொண்டு போய் எறக்கி விடப் போனா, அப்பத்தான் பொணத்த தூக்கிக்கிட்டு வெளில ஊர்வலம் கெளம்பீருச்சு. இவங்க ரெண்டு பேரும் அவசரத்துல எலக்கட்ட விட்டுட்டு போய்ட்டாங்ய.. ஹ்ம்.. அவன் குடுத்து வெச்சவன் போய்ச் சேந்துட்டான். #ஓசூர்ஆட்டோ

யாதும்ஊரே யாவரும்கேளிர்

மனித இனமே மேய்ச்சல் நிலங்கள் தேடி புலம் பெயர்ந்தது தான் வரலாறு. ஆற்றுப்படுகை நாகரீகங்களெல்லாம் அதைத்தான் சொல்கின்றன. ஒவ்வொருவரின் டிஎன்ஏ’வைப்பரிசோதித்துப் பார்த்தால் யாரும் தாம் வாழும் தற்கால நிலத்துக்குச் சொந்தமானவர் என நிரூபிக்க வாய்ப்புகள் குறைவு. இதில் நாடென்ன மதமென்ன ? குறுகிய மனங்களின் விகாரங்கள் தான் இவை. குழு மனப்பான்மையை விட்டு பல்கிப் பெருகி சமுதாயமாக வாழ முற்பட்ட மனித இனத்தை மீண்டும் கூண்டில் அடைக்க நினைக்கும் சிறுபிள்ளைத்தனம். சுற்றியிருக்கும் நாடுகளும் இதே பாணியைப் பின்பற்றி பெரும்பான்மை சமூகத்திற்கெனவே பேசுவது ,அதையே உறுதிப்படுத்துவது என்பன எல்லாம் கற்காலத்துக்கு மட்டுமே இட்டுச்செல்லும். #யாதும்ஊரேயாவரும்கேளிர்

ஏர்ஹோஸ்ட்டஸ்

எமது அலுவலகத்தில் ஒரு இளைஞி வேலைக்கு சேர்ந்தார். உள்ளூர் கன்னடிகா ஹுடுகி. கொஞ்சம் அலட்டலான ஒப்பனையோடேயே வலம் வருவார். டஸ்க்கி ப்யூட்டீன்னுல்லாம் சொல்ல முடியாது. நம்மூர் பொண்ணுகளைப் போலவே கருமை நிறத்தில் தான் இருப்பார். பிறகு பேச்சு கொடுத்தபோது தெரிய வந்தது, அவர் ஏர் ஹோஸ்ட்டஸ் பணிக்கென பயிற்சி எடுத்தவர் என. பெங்களூர்ல ஏகப்பட்ட இன்ஸ்ட்டிட்யூட் இதெற்கென இயங்கி வருகிறது. பயிற்சிக்கென விலை ஏகத்துக்கு கொட்டிக் கொடுக்க வேணும் லட்சங்களில். ஹிந்தி கண்டிப்பாக அறிந்திருக்க வேணும். நுனி நாக்கு ஆங்கிலத்தைப் பற்றி கேட்கவே வேண்டாம். எல்லாம் அவரிடம் இருக்கிறது.

ஒரே ஒரு பிரச்னை என்னவெனில் அவரின் இயல்பான நிறம். அதை மறக்கடிக்கும் அளவு தம்மை முன்னிறுத்த அவர் செய்த முயற்சிகளைப் பற்றி கதையாக சொல்வார். விமான பணிப்பெண்ணுக் கென கண்ணை மூடிக்கொண்டு நேபாளிகளை தேர்ந்தெடுத்து எடுத்துவிடுவார்கள் என. அத்தனை வெள்ளை அவர்கள். முகத்தில் சிறு பருத்தடம் கூட இருந்து விடக்கூடாது என்பதில் வெகு கண்டிப்பாக இருப்பார்கள் என்றார். மேலும் இவரின் கையில் முழங்கை அருகே பெரிய தழும்பு ஒன்று இருந்து போனது. அதை நீக்கி விட்டு வாருங்கள் என விடாப்பிடியாக கூறிவிட்டனர். அதற்கென பிளாஸ்டிக் சர்ஜரி செய்த பிறகு தழும்பு போக வழியிருக்கிறது, ஆனாலும் தொடர்ந்து உட்கொள்ள வேண்டிய மாத்திரைகளால். கேன்சர் வர வாய்ப்பிருக்கிறது என மருத்துவர்கள் சொல்லி விட்டனர் என்றார். இப்பெண்ணின் தந்தையோ அதெல்லாம் வேணாம், நீ உள்ள வேலையைப் பார் என்று கூறியிருக்கிறார்.

பெரிய விமான நிறுவனங்களில் தென்னிந்தியப் பெண்களே இல்லாது இருக்க இதுவே காரணம். என்ன வெள்ளாவி வைத்தாலும் நம்மவர்கள் வெள்ளையாக ஆக முடியாது. இதை விடலாம். வெளிநாட்டு விமான நிறுவனங்களில் ஆப்ரிக்க பெண்கள் பணி புரிவதை நானும் கண்டிருக்கிறேன். இங்கு மட்டும் என்ன இப்படி ஒரு நிபந்தனை ? எல்லாம் சினிமாவில் தான் நடக்கும் போலிருக்கிறது , பார்வதி நடித்து வெளிவந்த மலையாள ‘உயரே’வில் அவரின் காதலன் முகத்தில் அமிலம் வீசி அவரின் வாழ்க்கையை முடக்கி விடுவான், எனினும் ஒரு விமான நிறுவனம் அவருக்கு விமானப் பணிப் பெண்ணாகவே வேலை கொடுப்பார்கள்.! விமானப் பயணிகள் அனைவரும் அவரின் மன உறுதியைப் பாராட்டுவர்.! ஹ்ம்.... எல்லாம் சினிமாவில் மட்டுமே சாத்தியம் ! #ஏர்ஹோஸ்ட்டஸ்

#விலங்குகள்

வீட்டிற்குள் பாம்பு நுழைந்தபோது எதுவும் செய்யத் தோணவில்லை. எங்கே நம்மைக் கொத்தி விடுமோ இல்லை தீண்டி செயலிழக்கச் செய்து விடுமோ என்ற அச்சம் தான் பரவிக் கிடந்ததே தவிர அந்தச் சூழலை எங்கனம் கையாள்வது என்ற ஒரு உத்தி போலும் தோணவில்லை. எப்போதாவது இயக்கும் புகைபோக்கி விசிறியில் குட்டி போட்டு வைத்திருக்கும் எலிகளைப் பிடித்து தின்ன வந்து, தவறுதலாக வீட்டின் பரணில் அமர்ந்து கொண்டது. கீழிருந்த ஒரு பங்காலி கிராமத்து காவலாளி சொன்னது இன்னமும் என் நினைவில் நிற்கிறது. நீங்க அந்த பாம்புக்கு தீங்கு நினைக்காத வரை, அது மாதிரியான நடவடிக்கைகளில் ஈடுபடாத வரை அது உம்மை ஒன்றும் செய்யாது. அதன் நோக்கம் வேறு என்று. பிறகு அவரின் துணையுடனேயே யாருக்கும் எந்த கெடுதலுமின்றி வெளியே அனுப்பி வைக்கப் பட்டது. எலி வராமப் பாத்துக்குங்க , பாம்பு விரட்டுவதற்கு வேலையே இருக்காது என்றார்.

அதே போல மழைக்காலப் பூனை ஒன்று ஏகப்பட்ட குட்டிகளை வீட்டின் உள்ளடங்கிய உப்பரிகையில் ஈன்று வைத்து விட்டு ஒவ்வொரு முறை கதவைத் திறக்கும் போதும், எங்கே இவன் தமது குட்டிகளுக்கு எந்த ஆபத்தையும் செய்து விடுவானோ என்ற பயம் அதன் கண்ணில் தெரிவதை பல முறை பார்த்திருக்கிறேன். கொஞ்சம் நாட்கள் இங்கனம் பழகிப் போனதும் தம் நான்கு கால்களில் வலது முன்னங்காலை மட்டும் திருப்பிப் போட்ட ’ட’ போல மடித்து வைத்துக் கொண்டு உள்ளடங்கிய கண்களோடு என்னிடம் இறைஞ்சி நிற்கும். பிறகு தான் புரிந்தது ‘ நான் உன்னை என் நண்பனாக கருதுகிறேன், தாக்காதே’ என்று கூறுவதாக. அதன் பிறகு குட்டிகளை நான் கை கொண்டு தூக்குவதை ஒரு போதும் தடுத்ததில்லை.

இதெல்லாம் வீட்டுக்குள்ள வர்றது அபசகுனம் தம்பி. அதுக்கு ஒரு எலெக்ட்ரானிக் ரெப்பெல்லண்ட் ஒன்று இருக்கிறது அதை வாங்கி பிளக்கில் செருகி வைங்க, அதிலருந்து வர்ற அல்ட்ராஸொனிக் வேவ்ஸ்’னால ஒரு பொட்டு பூச்சி வராது என்றார் மேல்வீட்டு அங்கிள். அதிலிருந்து அவரிடம் பேசுவதையே விட்டு விட்டேன். 

விலங்குகள் நம்மிடம் அவர்களின் மொழியில் தொடர்பு கொள்ளத்தான் செய்கின்றன. நமக்குத் தான் புரிவதில்லை. இயற்கையை விட்டு வெகு தூரம் சென்று விட்டதைப்போல உணர்கிறேன். #விலங்குகள்

கேட்பிதழ்

புது எழுத்து அக்டோ’2019 கேட்பிதழ் (இந்தப்பதமே அழகா இருக்கே ) வாசித்துக்கொண்டிருந்தேன். சிறுகதைகள், கவிதைகள் மற்றும் ஐராதம் மாகாதேவனின் ’வின் பேட்டி அத்தனையும் நன்றாக இருந்தது.
சிறுகதைகளில் சட்டென மனதில் ஒட்டிக்கொண்ட புலிக்கதை ‘குமாரநந்தனின்’. இதழுக்கு உகந்த நடை. கணபதியின் இதயத்தை உருவிச்சென்ற புலி விடாது எனது இதயத்தையும் கவர்ந்து சென்றது.
பணயம் சிறுகதை சட்டெனெ முடிந்து விட்டதைப் போன்றிருந்தது. இந்த இதழுக்கு இந்த இதழ் பேசும் கருத்துச்செறிவுக்கு ஒப்பாது பாமரப்பாணியில் அமைந்த சிறுகதை அது.

சந்தனி ப்ரார்த்தனாவின் சிங்களச்சிறுகதையின் வடிவம் ஏனோ பட்டும் படாது சிறக்கவில்லை. சொல்ல வந்த முறையில் தவறா இல்லை மொழிபெயர்ப்பில் ஏதேனும் விடுபட்டதா என்ற குழப்பம்.பாலா’வின் சிறுகதை மாய யதார்த்தத்தை சொல்ல முயன்று விலகிச் சென்று வடிவச்சிக்கலில் சிக்கி மனதைக்கவர மறுக்கிறது.விர்ஜீனியாஉல்ஃபின் சிறுகதை மொழி பெயர்ப்பிலும் சிலிர்ப்பை ஏற்படுத்த தவறவில்லை. 

பா’ராஜாவின் கவிதையில் கோமாளி // இரவெல்லாம் அழுத கண்ணீரில் உறையாதிருந்த ஒரு துளியை விரலாற்தொட்டான்// சிறப்பு.
சுதேசமித்திரனின் ‘ஆரண்யம்’ சிறுபத்திரிகை பற்றிய குறிப்பு மிக அருமை. எனைக் கவர்ந்த நடை. அதிலும் ஜெமோ’ச்சீண்டியிருந்த வரிகள் அற்புதம் .

மொத்தத்தில் தாமதமாக வந்திருப்பினும் தற்காலத்திற்கென வந்திருக்கும் புது எழுத்து கேட்பிதழ்2019 #புதுஎழுத்து

#அயோத்தி.

பெரிய பெரிய ரைட்டப்லாம் எழுதுகிறார்கள் , அயோத்தி தீர்ப்புக்காக. இதைப்பற்றி பேசவேண்டாம் என்றிருந்தேன். இருப்பினும் சொல்லிவிட நினைக்கும் ஒன்றே ஒன்று. இங்க பெங்களூரில் அகரா’ன்னு ஒரு இடம் இருக்கிறது. மிகப்பிரபலமான பகுதி. அதில் ஒரு ஆஞ்சநேயர் சிலை கிட்டத்தட்ட 200அடிகள் இருக்கலாம், ஓங்கி உயர்ந்து நிற்கும். கற்சிலைதான் அத்தனை அழகிய வண்ணங்கள் பூசப்பட்டு ஜொலிக்கும். அதன் தொட்டடுத்து ஓரடிபோலும் இடைவெளி இல்லாது ஒரு பள்ளி வாசலின் மினரட் (கோபுரம்) அதோடு கூடிய பள்ளிவாசல் கட்டப் பட்டிருக்கும். பாங்கு ஒலியும் எழும் நேரத்துக்கு. 

இன்னும் முடியவில்லை. அதனையும் தொட்டடுத்து ஒரு ஒரிஸ்ஸா பாணியில் அமைந்த ஜெகந்நாதர் ஆலயமும் இருக்கிறது. வடநாட்டு பாணியில் ஒவ்வொரு கோபுரத்திலும் காவிக்கொடி பறந்து கொண்டிருக்கும். பஜனைகள் காதைத்துளைக்கும் , அந்த மேம்பாலத்தை கடந்து செல்லும்போது. மூன்று வழிப்பாட்டுத் தலங்களும் நூறடிக்கு உள்ளேயே அமைந்திருக்கும்.அது தான் சிறப்பு,

நீதிமன்றத்தின் தீர்ப்பை விமர்சிப்பது தவறுதான். இருப்பினும் இதைப்போல மஸ்ஜிதும், கூடவே ராமனும் அருகருகே இருந்து அயோத்தியில் அருள் பாலித்திருக்க நீதி வழிவகை செய்திருந்தால் இன்னமும் மகிழ்ந்திருப்பேன், #அயோத்தி.