“அரிச்சந்திரா” தோற்பாவைக்கூத்து

அழிந்து வரும் கலைகளில் ஒன்றான தோற்பாவைக்கூத்து நடந்தேறியது நேற்று 18-11-2012 பெங்களூர் ஜெய்பீம் பவனில் , கலைஆர்வலர் மற்றும் “களரி தொல்கலைகள் மற்றும் கலைஞர்கள் மேம்பாட்டு மையம்” என்ற ட்ரஸ்ட்டை நடத்தி வரும் திரு மு.ஹரிகிருஷ்ணன் அவர்கள் நிகழ்ச்சி ஒருங்கிணைத்து வழங்கினார்.

தொடரும் பொருளாதார நெருக்கடியிலும் அழிந்து வரும் கலைகளைத் தம்மால் இயன்றவரை இந்த்தலைமுறைக்கு எடுத்துச்செல்ல முயல்பவர். கலைஞர்களுக்கு தொடர்ந்து வாய்ப்புகள் கொடுத்தும், அந்தக்கலைகள் அழிந்து விடாது , ஒரு கலைக்கூடம் – கூத்துப்பள்ளி –நிரந்தரமாகக் கட்டும் பணியிலும் ஈடுபட்டு வருகிறார். அது குறித்த நிதி திரட்டும் வகையிலும், பெங்களூரில் இருக்கும் கலை ஆர்வலர்களின் கண்களுக்கு விருந்தாக்கவும் நிகழ்ச்சி ஏற்பாடு செய்யப்பட்டிருந்தது “பெங்களூர் ஜெய் பீம் பவனில் (டவுன் ஹால் அருகில்).

தோற்பாவைக்கூத்து, கட்டபொம்மலாட்டம்,கூத்து முதலிய தொல்கலைகள் தமிழர்தம் நுகர்வுக்கலாச்சாரத்தால் நசிந்து வருகின்றன. இவ்வரிய கலைகளை மீட்டெடுப்பதும் , ஆவணப்படுத்துவதும் மட்டுமல்ல, ஆதார வடிவம் மாறாது அவற்றை வளர் தலைமுறைக்கு கைமாற்றித்தருவதும் நமது இன்றியமையாத கடப்பாடு ஆகும்.

நிகழ்த்துக் கலைஞர்களைப்பற்றிய ஒரு சிறிய அறிமுகம்

அம்மாப்பேட்டை கணேசன் -அய்யா கணேசன் அவர்கள் தோற்பாவைக்கூத்து, கட்டபொம்மலாட்டம்,கூத்து முதலான கலைகளில் சிறந்து விளங்குபவரும் , தமிழகத்தில் தற்போது காணக்கிடக்கும் பத்தே பத்து கலைஞர்களில் ஒருவர்.வாழ்வை முழுமையாக கலைக்கெனவே அர்ப்பணித்தவர். “அரிச்சந்திரா” தோற்பாவைக்கூத்தை நிகழ்த்தியவர்.

அம்மாப்பேட்டை செல்லப்பன் -இவர் “அய்யா கணேசனின்” தமையனார்.மிருதங்கமும் ,கூடவே பாடல்களும் பாடக் கூடியவர்.

முகவீணை நாகமரை குமார் – நாயனம் போன்ற சிறிய வாத்தியக்கருவியை வைத்துக்கொண்டு வர்ணஜாலங்கள் காட்டுகிறார்.

ஹார்மோனியம் சுப்ரமணி – ஆதார சுதி இவரின் ஆர்மோனியத்திலிருந்துதான் கிளம்புகிறது.

தாளம் ரமேஷ் – கூடி வரும் தாளமும்,ஒருமித்த குரலுமாக தோற்பாவைக்கூத்தை ஒரு நிகழ்கால நிகழ்வு போல மாற்றிக்கொண்டிருப்பவர்.

என்னுடைய சிறுவயதில் ஊரில் நடந்த கோயில் திருவிழாக்களில் கரகாட்டம், ஒயிலாட்டம், ராஜா ராணி ஆட்டங்கள் எல்லாம் பார்த்த எனக்கு அவை நினைவில் எப்போதும் தங்கிப்போனவை. இந்தத் தோற்பாவைக்கூத்து என்பது என்னைப்பொருத்தவரை ரொம்பவும் புதிதான ஒன்று. பொம்மலாட்டங்கள் கூட ஒரு சில இடங்களில் கண்டது உண்டு.

இந்தத் தோற்பாவைக்கூத்துக்கென , ஆட்டின் தோலைப்பதப்படுத்தி , அதை மெருகேற்றி பிறகு கதாபாத்திரங்களூக்கேற்ப அவற்றை உருவங்களாக நறுக்கி ,  வர்ணங்கள் பூசி என ஏகத்துக்கு முன்னேற்பாடுகள் செய்யப்படவேண்டிய ஒன்று.

ஒவ்வொரு கதாபாத்திரங்களுக்கும் உண்டான ஆடை அணிகலன்கள், வேல் , அம்பு, மற்றும் ஐயர் குடுமிகள் , அவற்றின் பானை வயிறு என்றெல்லாம் அதை அமர்ந்து கலை நேர்த்தியோடு உருவாக்க வேண்டும். அவற்றின் கண்களில் வேறுபாடு காண்பிக்கிறார் “அய்யா கணேசன்” . அதே சந்திரமதி நாடாளும் அரிச்சந்திர மன்னனின் ராணியாக இருக்கும்போது உள்ள உடுப்புகளும் ,முக்கியமாக தீட்சண்யமான அவளின் கண்களும் , பின்னர் அவள் ஒரு பிராமணனின் வீட்டு வேலைக்காரியாக விற்கப்பட்டவுடன் காணக்கிடைக்காது போகின்றன.

அந்த வேலைக்காரி உருவத்திற்கென இடுங்கிய கண்களும், அத்தனை சோபிக்காத உடுப்புகளுமாக , நகைகள் அனைத்துமிழந்து போய் நம்மை கண்கலங்க வைக்கிறார். இப்படி ஒவ்வொரு கதாபாத்திரங்களுக்கும் , குறைந்தது மூன்று வேடங்கள் அரிச்சந்திரா நாடகத்தில் வருகிறது. அவற்றுக்குப்பொருத்தமான வேலைப்பாடு கொண்ட தோற்பாவைகளை உருவாக்கி அவற்றை வேணும்போது கயிறு கொண்டு அசைத்து நம்மை அந்தக் கதாபாத்திரங்களோடு ஒன்றிப்போகச்செய்கிறார். திரை நடிகர்களையும் மிஞ்சும் பாவனைகள் காட்டுகின்றன பாவைகள்.

இதுபோன்ற நிகழ்வுகளுக்குச் சென்றால் மட்டுமே இப்படியான கலைகள் இன்னமும் இருந்து வருகின்றன என்பது தெளிவாகிறது. இது சம்பந்தமான காட்சிகள் ‘அழகி’ மற்றும் ‘அவள் பெயர் தமிழரசி’ என்ற திரைப்படங்களிலும் வருகிறது ,அதற்கான முக்கியத்துவம் அத்தனை கொடுக்கப்படாவிட்டாலும் கூட போகிறபோக்கில் காண்பித்துவிட்டு போகிறது.. எத்தனை பேர் இவற்றை கவனித்தோம் ?

Pogo , Cartoon Network Channels பார்க்கும் நம் குழந்தைகளின் மனதில் மேற்கத்திய நாடுகளின் மிக்கி மௌஸ், டொனால்ட் டக் போன்ற கதாபாத்திரங்கள் எவ்வித உள்ளுறுத்தலுமின்றி அவர்களால் விதைக்கப்படுகிறது.முழுக்க வியாபார நோக்கில்.நம்மிடம் இருக்கும் இந்தத் தோற்பாவைக் கூத்துக்கு அந்த மாதிரியான தொலைக்காட்சி சேனல்களில் இடமேயில்லை. நாமளே முதலில் பார்ப்பதில்லை, பிறகல்லவா நமது குழந்தைகளுக்கு இவற்றைக்காண்பிக்க ?

சினிமாத்திரையில் முன்னேற்பாடுகள் செய்து,இயக்குநர்,இசை அமைப்பாளர்,கதை/திரைக்கதை இன்னபிற விஷயங்களும் , அவற்றுக்கான உதவிகளும் ஒருங்கே கிடைத்து , தமது

“திறமையை” பல டேக்குகள் வாங்கி , பல சமயங்களில் கதையையே தமக்கென , தம் புகழ் வருமாறு மாற்றிக்கொள்ளவும் செய்யும் செல்லுலாய்ட் சிற்பங்கள் எல்லாம் இந்த உண்மைக்கலைஞன் முன்னிலையில் தலை குனிந்து நிற்க வேண்டும். நிகழ்ச்சிக்கென தகுந்த முன்னேற்பாட்டுடன் வந்தாலும் , கதை சொல்லும் விதம் , அவற்றுக்கான இசை , இடையே வரும் பாடல்கள் அனைத்தும் எவ்விதத்தடையுமின்றி , தடங்கலின்றி நேரடியாக நிகழ்த்திக்காண்பிக்கப்படுகிறது. ‘டேக்’குகள் எடுக்க வாய்ப்பேயில்லை. இப்படிப்பட்ட கலைஞர்கள் கோடியில் சம்பாதிக்கிறார்களா ? தெருக்கோடியில் சீண்டுவாரற்று கிடக்கிறது இந்தக்கலை.

கோடிகளில் சம்பாதிக்கும் அந்தத்திரைக்கலைஞர்கள் தமது ஒரு நாள் ஊதியத்தைக் கொடுத்தாலும் போதும் இந்த உண்மை நிகழ்த்துக்கலைஞன் ஒரு ஆண்டு உண்ணவும் , தமது கலையை வியாபார நோக்கின்றி பலருக்கும் எடுத்துச்செல்லப் போதுமாயிருக்கும் என்பதே முகத்திலறையும் உண்மை.

இன்றும் மழை வரவில்லை

மலைகள் இதழில் வெளியான இன்றும் வராத மழை

 

வீட்டில் காண்பிக்க இயலாத
மதிப்பெண்களை சிலேட்டிலிருந்து அழித்துவிட
இன்று மழை வரவில்லை

சாலைகளின் மேடு பள்ளங்களை நிரப்பி
குதித்துத் தாண்டிக்கொண்டே வீடு செல்ல
இன்று மழை வரவில்லை

ஆசிரியரின் ‘ஏண்டா லேட்டு’க்கு
‘மழைல நனைஞ்சிட்டேன் சார் அதான்
உடுப்பு மாத்தப்போயிருந்தேன்’
என்று சாக்கு சொல்ல
இன்று மழை வரவில்லை

வகுப்பறையில் மூன்று பேர் அமரும் இடத்தில்
நெருக்கியடித்துக்கொண்டு ஐவராக அமர்ந்து
உடற்சூட்டை பரிமாறிக்கொள்ள
இன்று மழை வரவில்லை

ஓட்டிலிருந்து தொடர்ந்து விழும் மழைத்துளிகள்
உண்டாக்கும் சிறுகுழிகளைக் கண்டு மகிழ
இன்று மழை வரவில்லை

‘ஈரத்துல போய் விளையாடாதே
காய்ச்சல் வந்துரும்’ என்று
அம்மாவிடம் ஏச்சு வாங்கவைக்க
இன்று மழை வரவில்லை

‘அம்மா இன்னிக்கு மழை பெய்யுது
அதனால பள்ளிக்கூடம் போகமாட்டேன்’
என்று சாக்கு சொல்ல
இன்று மழை வரவில்லை

தொடர்ந்தும் போடும் பந்துகளில்
சொற்ப ரன் கூட எடுக்க முடியாமல்
திணறும்போது சாக்கு சொல்லி
எப்படியாவது விளையாட்டை நிறுத்திவிட
இன்று மழை வரவில்லை

இங்ஙனம் தொடர்ந்து கொண்டேயிருக்கும்
என்னை எழுத விடாமல் தடுக்க
இன்றும் மழை வரவில்லை

.

காதல் ரோஜா

உயிரோசை'யில் வெளியான காதல் ரோஜா

 

ரோஜாக்களை
கத்திரி கொண்டு வெட்டி
மாலையாக்க துணிந்த எனக்கு
காதல் பற்றி என்ன
பெரிதாகத் தெரிந்துவிடப்போகிறது
என்ற உன் வாதம்
அதைச்செடியில் இருந்து
பறிக்கும்போதே தெரிந்திருக்க
வாய்ப்பில்லைதான்.

.

பருக்கை

வல்லினம் இதழில் வெளியான கவிதை **** மலம் புசிக்க வைக்கப்பட்டவனின் ஒவ்வொரு கவளத்திலும் அவனுக்குப் புகட்டிவிடுபவன் பெயர் இருக்கிறது. **** .

மழையும் தேநீரும்

உயிரோசை'யில் வெளியான இன்னுமொரு மழைக்கவிதை

தலை நிமிர்த்திக்கொண்டு
பார்த்துக்கொண்டே
நடந்துகொண்டிருந்த எனக்கு
இருட்டிக்கொண்டு வந்த வானம்
பொழியக்காத்திருந்தது

இன்னும் கொஞ்சம் தான் தூரம்
எட்டி நடந்தால் சென்றடைந்து விடலாம்
அருகிலுள்ள தேநீர்க்கடையை

ஏற்கனவே கடைக்கு முன் சிலர் நின்றிருந்து
வழியை அடைத்துக்கொண்டிருந்தனர்
நாயரின் குரல் மட்டும் உள்ளிருந்து கேட்டது

ஆணை கொடுத்து காத்திருந்தபோது
முதலில் விழுந்த துளி
அருகில் புகைத்துக்கொண்டிருப்பவனின்
பீடி நுனியை நனைத்தது.
சட்டென உதறியவனின் கங்கு
என் கையின் பின்புறத்தில் விழுந்து
சிறு சூட்டை உணரச்செய்தது

தொடர்ந்தும் பெய்த மழை
மேற்கூரைத் தகரங்களில் ஒலியெழுப்பிக்கொண்டு
தாரை தாரையாக விழுந்து கொண்டிருந்தது

தெறித்த மழைநீருடன் கரையை ஒட்டியிருந்த
சேறும் சகதியும் வேட்டியைத் தூக்கிப்பிடித்த
என் கால்களில் அப்பிக்கொண்டது

நனைந்து கொண்டிருந்த குருவிகள்
தம் அலகால் தெப்பலாக நனைந்த
இறகுகளைக் கோதி விட்டுக்கொண்டிருந்தன

பொழிந்து முடித்த வானம்
வெளிர் நீலமாக சுத்தமாகக்கிடந்தது.
ஆங்காங்கே சிறு குட்டைகளில்
தேங்கிக்கிடந்த மழை நீரில்
தலை கவிழ்த்து
என் முகம் பார்த்துச்சென்று
கொண்டிருக்கிறேன்.

இன்னொரு மழைக்கும்
இன்னொரு தேநீருக்கும்
எத்தனை காலம் காத்திருக்கவேண்டிவரும்
என மனதிற்குள் எண்ணியபடி.

குறை ஒன்றும் இல்லை  

தேநீரில்
சர்க்கரை அளவு குறைவு
போலத்தென்பட்டது.
சற்று ஜன்னலின் வெளியே
கோப்பையை நீட்டினேன்
விழுந்தன சில துளிகள்
குறை ஒன்றும் இல்லை
இப்போது ..


.

பாடுபொருள்

உயிரோசை'யில் வெளியான கவிதை

என் கவிதை தனக்குள் வந்து உலவ

மழையை, அதனோடு கூடிய தேநீரை
காற்றை, பூக்களை
மயங்கும் புறத்தோற்றத்தின் அழகுடன் கூடிய
எந்தப்பெண்ணையும் அனுமதிக்கவில்லை

என் கவிதை தனக்குள் வந்து உலவ

வறுமையை, செழுமையை, 
கடவுளை சாத்தானை,கண்ணாடிகளை, அதன் பிம்பங்களை,நிழல்களையும் அவற்றின் நிஜங்களை
மயக்கும் மதுவையும்
இன்னபிற லாஹிரி வஸ்த்துக்களையும்
அனுமதிக்கவில்லை

என் கவிதை தனக்குள் வந்து உலவ

குழந்தைகளை, முதியோரை
சித்ரவதைகளை, காதலை,
நிராகரிப்பை,அறிவுரைகளை, பிதற்றல்களையும்
அனுமதிக்கவில்லை

என் கவிதை தனக்குள் வந்து உலவ

போரை, அமைதியை,அசடனை, அறிவாளனை
பறவையை, ஏன் அதன் ஒற்றைச்சிறகைக்கூட
அனுமதிக்கவில்லை

என் கவிதை தனக்குள் வந்து உலவ

மாயையை, காட்சிப்பொருளை
சொர்க்கத்தை, நரகத்தை
பொதுவுடைமையை, முதலாளித்துவத்தை
சோஸலிஸத்தை அனுமதிக்கவில்லை

என் கவிதை தனக்குள் வந்து உலவ

ரசிகனை, உருவாக்குபவனை
வழிப்போக்கனை, தேசாந்திரியை
பக்கிரியை அனுமதிக்கவில்லை

கடைசியாக ஒரு உண்மையைக்கூறுகிறேன்
உங்களிடம் மட்டும்,
இந்தக்கவிதை தனக்குள் நுழைந்து உலவ
என்னையே அனுமதிக்கவில்லை.

.

ஒன்று சேர்ந்த தென்றல்

உயிரோசை'யில் வெளியான கவிதை

ஜன்னல் கதவுகள் மூடியிருப்பினும்
அவற்றின் இடைவெளியூடே
பயணித்து வருகிறது

சிலசமயம் வரவா வேண்டாமா
என்று கேட்டுக்கொண்டு
அங்கேயே நிற்கிறது.

மர இலைகளை சிறிது அசைத்துப்பார்த்துவிட்டு
தனக்கு முக்கியத்துவம் கொடுக்கவில்லையெனக்
கோபித்துக்கொண்டு சட்டென நின்றுவிடுகிறது,

வண்ணத்துப்பூச்சிகளின் இறக்கைகளை
மெலிதே மடங்கச்செய்து பின்,
சற்றே வலுவாகி அதைத்தன்போக்கில்
இழுத்துச்செல்கிறது

இலைகளை அசைத்துக்கொண்டிருப்பதைப்
பார்த்துக்கொண்டிருக்கும் என்னை நோக்கி
வர எத்தனிக்கிறது 

சீராகப்பெய்து கொண்டிருக்கும் மழைச்சாரல்களின்
உள்ளே புகுந்து அவற்றின் சீர் வரிசையைத்
தள்ளாடச்செய்கிறது ,

கீழே விழுந்துவிட்ட இளம் இலையைத்
தம்மால் இயன்றவரை மேலெழும்பச்செய்கிறது,

வியர்த்திருக்கும் வேளையில்
அந்தப் பனித்துளிகளைக் கவர்ந்து செல்கிறது,

அருகிலுள்ள பூந்தோட்டத்தின் வாசனையைத்
தம் கரங்களால் அள்ளிவந்து என்னிடம் சேர்க்கிறது,

இவையனைத்துமாக ஒன்று சேர்ந்து
உன்னை நினைத்ததும்
என் மனதுக்குள் பரவி நிற்கிறது.

 .